વિકસતા વિશ્વ સાથે આપણા સમાજના નવયુવાનો કદમ મિલાવી શકે , નવી દિશા નવા વિચારો નવુ આયોજન કરી શકે તેમજ યોગ્ય માર્ગદર્શન સમય ન મળવાને કારણે સ્પર્ધાત્મક યુગમાં પાછળ ન રહે તે માટે તેઓને શિક્ષણ અને યોગ્ય માર્ગદર્શન એ જ સાચો ઉપાય છે.
આપણા સમાજના સભ્યોએ સમાજના વિકાસમાં કોઈપણ ક્ષેત્રે તન , મન અને ધનથી સહકાર આપ્યો છે. ફંડ એકત્રીકરણમાં અનુમાન કરતા સારો પ્રતિસાદ મળ્યો છે. સ્નેહમિલન કાર્યક્રમના વ્યક્તીગત ભોજનદાતા , જાહેરાતના દાતાશ્રીઓ તથા તેજસ્વી તારલાઓને સન્માનિત કરવા માટે દાતાશ્રીઓએ આર્થિક સહયોગ આપેલ છે.
સમાજના વહીવટમાં હરહંમેશ ચિંતા કરનાર રચનાત્મક સલાહ સૂચન નમ્ર ભાવે કરનાર આપણા સમાજના સ્થાપક પ્રમુખ તથા પૂર્વ પ્રમુખો, હોદ્દેદારો, કારોબારી સભ્યો ટ્રસ્ટી મંડળના પ્રમુખો, હોદ્દેદારો તથા સમાજનું આર્થિક પાસું સમૃધ્ધ બને તેનું ચિંતન કરનાર સર્વે ટ્રસ્ટીઓની સેવા સમાજને પ્રાપ્ત થયેલ છે.

સમાજ વ્યક્તિઓથી બને છે અને સમાજ વ્યક્તિઓની ઓળખ નિભાવે છે. દરેક વ્યક્તિએ સમાજના ઋણને નિભાવવા માટે મદદરૂપ થવું જોઈએ. આપણા સમાજનું વધારેમાં વધારે ગૌરવ અને ગરીમા વધે તે જોવાની આપણા સહુની સામૂહિક જવાબદારી અને ફરજ છે.

વર્તમાન સમયમાં સમાજ ધ્વારા હજુ બીજા ઘણા નવા ક્ષેત્રોમાં સહિયારા કામો કરવાના છે. વર્તમાન ૨૧ મી સદીની માંગ પ્રમાણે સમાજની એક એક વ્યક્તિ બૌધિક તેમજ આર્થિક રીતે સજ્જ બને તેવા પ્રયત્ન કરવા પડશે. જેના માટે વ્યક્તિ વિકાસ તેમજ કારર્કિદીને લગતું માર્ગદર્શન સ્વરોજગારીને લગતી માહિતી અને માર્ગદર્શન શૈક્ષણિક ક્ષેત્રે તેજસ્વી તારલાઓને મદદ સાંસ્કૃતિક વિકાસલક્ષી કાર્યક્રમો વગેરે જેવી અન્ય પ્રવૃત્તિઓ પરત્વે ધ્યાન દોરી સમાજના વડીલોએ તેમજ જે તે ક્ષેત્રના જાણકાર એવા સમાજના સભ્યોએ આગળ આવીને મદદરૂપ થવું પડશે.

સમાજના માન. અધ્યક્ષશ્રી કાળીદાસ ટી. પટેલના સુચન અન્વયે સમાજની કારોબારીની તા: ૨૭/૧૦/૨૦૨૧ બુધવારના રોજ મળેલ મીટીંગમાં ઉત્તર ગુજરાત ૪૧ ગામ કડવા પાટીદાર સમાજ, ગાંધીનગરની વેબસાઇટ Invision Software Solution, Gandhinagar મારફત તૈયાર કરવાનો નિર્ણય લેવામાં આવેલ.
પ્રથમ તબક્કામાં સમાજના સભ્યોની માહિતી સંકલીત કરી વેબસાઇટ પર અપલોડ કરવામાં આવશે અને ત્યારબાદ તબક્કાવાર સભ્યોના પરીવારની સામાજીક, શૈક્ષણિક તેમજ ધંધા-રોજગારની માહિતી સંકલીત કરી વેબસાઇટ પર અપલોડ કરવામાં આવશે. સમાજના સભ્યોની તથા તેઓના પરીવારની જરૂરિયાત મુજબની માહિતી સંકલીત કરી પુરી પાડવા સમાજના હોદ્દેદારો તથા સેક્ટર/વિસ્તારના કારોબારી સ્ભ્યોને વિનંતી. વધુમાં, વેબસાઇટ તૈયાર કરવામાં મદદરૂપ થઇ શકે અથવા જરુરી માર્ગદર્શન આપી શકે તેવા જાણકાર સભ્યોએ સંપર્ક કરવા વિનંતી.